ភ្នំពេញ៖ អ្នកនាំពាក្យក្រសួងព័ត៌មានបានឆ្លើយតបចំពោះការស្នើសុំឲ្យមានការបើកឡើងវិញនៃសារព័ត៌មាន VOD ថាមិនអាចទៅរួច និងថាការដកអាជ្ញាប័ណ្ណអង្គភាពសារព័ត៌មានដែលប្រព្រឹត្តិខុសច្បាប់ វិជ្ជាជីវៈសារព័ត៌មានធ្ងន់ធ្ងរ និងបំពានសិទ្ធិអ្នកដទៃ ហើយមិនព្រមទទួលកំហុសរបស់ខ្លួនដូចជា VOD ជាដើម មិនធ្វើឱ្យប៉ះពាល់ដល់សិទ្ធិសេរីភាពសារព័ត៌មានកម្ពុជានោះទេ។

អ្នកនាំពាក្យក្រសួងព័ត៌មានបានបញ្ជាក់ក្នុងលិខិតឆ្លើយតបនឹងញត្តិយុវជនប្រមាណជា ១០នាក់ បានអះអាងថា មកពីក្លឹបយុវជនចំនួនស្នើសុំឱ្យក្រសួងពិនិត្យឡើងវិញ ដើម្បីអនុញ្ញាតឱ្យវិទ្យុ VOD និងសារព័ត៌មានផ្សេងៗទៀត ដែលត្រូវបានដកអាជ្ញាប័ណ្ណ ឱ្យបើកដំណើរការឡើងវិញ ដោយបញ្ជាក់ថា៖ «ការដកអាជ្ញាប័ណ្ណពីអង្គភាពព័ត៌មានណាមួយ សុទ្ឋតែអនុវត្តទៅតាមនីតិវិធីដែល មានចែងក្នុងច្បាប់ លិខិតបទដ្ឋានគតិយុត្តិនានាដែលមានជាធរមាន។ ការដកអាជ្ញាប័ណ្ណអង្គភាពសារព័ត៌មានដែលប្រព្រឹត្តខុសច្បាប់ បំពានក្រមសីលធម៌វិជ្ជាជីវៈសារព័ត៌មានធ្ងន់ធ្ងរ និងបំពានសិទ្ធិអ្នកដទៃ ហើយមិនព្រមទទួលស្គាល់កំហុសរបស់ខ្លួន ពុំអាចចាត់ទុកថា ជាការរឹតត្បិតសិទ្ធិសេរីភាព ការគំរាមកំហឺង ឬធ្វើទុកបុកម្នេញដល់អង្គភាពសារព័ត៌មាន ឬអ្នកសារព័ត៌មាន នោះឡើយ»។

អ្នកនាំពាក្យបញ្ចាក់បន្ថែមថា ការផ្តល់អាជ្ញាប័ណ្ណដល់អង្គភាពសារព័ត៌មាន ទាំងអស់ក្រសួងពុំដែលបានបញ្ជាក់ថាសារព័ត៌មានណាមួយឯករាជ្យ ឬមិនឯករាជ្យឡើយ។ ដូច្នេះអ្នកនាំពាក្យក្រសួងព័ត៌មានយល់ឃើញថា ការប្រើពាក្យ “សារព័ត៌មាន ឯករាជ្យ” ជាចេតនាដែលនាំឱ្យមានការបែងចែក រើសអើង និងបំបែកបំបាក់សាមគ្គីភាពរវាងអង្គភាព សារព័ត៌មាន និងអ្នកសារព័ត៌មានកម្ពុជា។

អ្នកនាំពាក្យក្រសួងព័ត៌មានបានអំពាវជាថ្មីម្ដងទៀតសូមឱ្យអង្គភាពសារព័ត៌មាន និងអ្នកសារព័ត៌មានទាំងអស់ គោរពក្រមសីលធម៌ វិជ្ជាជីវៈ ច្បាប់ និងលិខិតបទដ្ឋានគតិយុត្តិនានាដែលមាន ឱ្យបានត្រឹមត្រូវ ដើម្បីលើកកម្ពស់តម្លៃ និងសេចក្តីថ្លៃថ្នូររបស់អង្គភាពនិងអ្នកសារព័ត៌មាន៕